O Consello Local lembra que os edís do PP se reservaron, nada máis entrar no goberno, un espazo diante do Liceo para aparcar os seus coches cando queren, mesmo cando é evidente que, por data e hora, non están no Concello. Califican a medida coma “dereito de pernada” e advirten de que “por fortuna hai cámaras de fotos”.

Betanzos, 27 de febreiro de 2008. O BNG voltou a denunciar no pleno, facéndose eco de numerosas queixas dos veciños e veciñas, o aparcamento indiscriminado e consentido de vehículos no Casco Histórico. Debatíase unha moción de outro grupo sobre o aparcamento das motos no Campo e o BNG repetiu a súa proposta de habilitar o espazo de xunto ao palco da música, que xa fora levada á comisión de tráfico. “Compartimos o espírito da proposta” admitiu o edil Xabier López, se ben explicou que “as nosas preocupacións van máis alá” advertindo ao PP de que se “retrocedera” no tocante ao tráfico no Casco Vello. López enumerou as queixas que os veciños fixeron chegar aos nacionalistas sobre o aparcamento indiscriminado nas rúas do Castro, Ferreiros, Travesa e Porta da Vila e mais nas prazas do Concello e de Fernán Pérez de Andrade.. Lembrou que nos Ferreiros foran os veciños quen lideraran unha recollida de sinaturas para retirar os vehículos de diante das portas de casas e negocios e que agora tiñan que padecer novamente as consecuencias da falta de celo do goberno municipal, que permitira a desaparición das xardineiras colocadas na rúa.